ہم تو بس راہ محبت کے مسافر ہیں خمار

رئیسہ خمار آرزو

اہل دل اہل نظر اہل زباں تک پہونچے 

بات دل کی ہے تو پھر دل کے جہاں تک پہونچے

 

چل تو نکلے ہیں سبھی دل کی ڈگر پر لیکن

کس کو معلوم ہے اب کون کہاں تک پہونچے

 

کتنا مشکل ہے مداوائے غم جاں ہمدم
حال دل کیسے بھلا میری زباں تک پہونچے

 

باغباں کی یہ عنایت ہے کہ قسمت کا ستم
قافلے کیسے بہاروں کے خزاں تک پہونچے

 

ہم تو بس راہ محبت کے مسافر ہیں خمار
ہم سے دیوانے کہاں سود و زیاں تک پہونچے

رئیسہ خمار آرزو