اللہ ہر مسلمان کو حسن خاتمہ نصیب فرمائے ، والد گرامی مولانا عبدالحمید رحمانی رحمہ اللہ کے قدردانوں میں ایک نام انکے شاگرد رشید معروف علمی شخصیت ڈاکٹر فضل الرحمن سلفی مدنی رحمہ اللہ کا تھا ، دہلی آمد کے موقع سے ایک بار ان سے تفصیلی ملاقات اور جامعہ اسلامیہ سنابل کے طلبہ کے مابین انکے قیمتی نصیحتی کلمات میں شرکت کا موقع نصیب ہوا تھا ، وہ اس بات کو بہت زور دیکر بیان کرتے تھے کہ انکے استاذ یعنی والد گرامی کے اندر منہجی ومسلکی غیرت بے مثال ہے ۔ اللہ شیخین کی مغفرت فرمائے ، جنت میں اعلی مقام سے سرفراز فرمائے اور انکی خدمات کو انکے لئے صدقۂ جاریہ بنائے ۔

ڈاکٹر فضل الرحمان رحمہ کے فرزند ارجمند شیخ احمدمحمدی مدنی بھی گزشتہ روز جوانی کی عمر میں وفات پا گئے ، ایک عرصہ سے وہ کینسر کے مرض میں مبتلا تھے ، وہ جامعہ اسلامیہ مدینہ نبویہ میں کئی مادوں میں میرے ہم سبق بھی رہے ، بہت شریف ، سنجیدہ ، متواضع اور خاموش طبیعت کے مالک تھے ، ایک دوسرے کا احترام ، ایک دوسرے کا ممکنہ تعاون کا جذبہ تھا اور حصول علم کی مبارک راہ میں وہ اپنی مثال آپ تھے ۔ جامعہ اسلامیہ مدینہ میں انکا ساتھ آج بھی ذہن میں نقش ہے ، مدینہ سے فراغت کے بعد وہ غالبا جبیل دعوہ سنٹر سے وابستہ ہو گئے پھر انہوں نے تعلیمی سلسلہ کو جاری رکھتے ہوئے القصیم یونیورسٹی میں داخلہ لے لیا اور “ایم اے “ کے بعد “ پی ایچ ڈی “کے مرحلہ میں مشغول ہوگئے ، سعودی عرب کے سابقہ اسفار میں القصیم یونیورسٹی میں زیر تعلیم ہندوستانی طلبہ علمی ونصیحتی مجلس کا اہتمام کرتے رہے ہیں اس موقع سے میں نے ازراہ مذاق کہا کہ “احمدمیرے سب سے بزرگ ساتھی ہیں “ جس پر وہ بہت خوش ہوئے جبکہ وہ بزرگ نہیں تھے لیکن انکی سنجیدگی اور متانت سے بزرگی جھلکتی تھی اللہ انکی مغفرت فرمائے ، انکو اعلی مقام اور رفع درجات سے نوازے اور انکے اہل خانہ کو صبر جمیل عطا فرمائے نیز انکے معصوم بچوں کی کفالت فرمائے ۔ اس تحریر کے ساتھ جو تصویر لگائی گئی ہے وہ جامعة القصيم کی ایک مجلس کی ویڈیو رکارڈنگ سے لی گئی ہے ۔ میں عموما بلا کسی مجبوری کے تصاویر سے اجتناب کرتا ہوں لئکن ایک تصویر اس لئے پوسٹ کر دی کہ لوگ احمد محمدی مدنی رحمہ اللہ کو پہچان سکیں اور ساتھ ہی یہ پیغام بھی چلا جائے کہ اس تصویر میں موجود ایک ابھرتے ہوئے علمی ستارہ کی وفات ہوگئی ہے اور دوسرا اپنی کمزور صلاحیت اور بے عمل زندگی کے ساتھ اپنی باری کا انتظار کر رہا ہے ، اللہ حسن خاتمہ نصیب فرمائے ۔ آمین ۔ (محمدرحمانی  دہلی)

—————————————————————