سعودی سفیر برائے نیپال نے صدر جمہوریہ کو اسناد پیش کیں؛ سفارتی استحکام اور باہمی تعاون کی سمت پیش رفت: قمرالدين رياضي

کاٹھمانڈو – مورخہ 24 فرورى 2026 كو کٹھمنڈو کے ایوانِ صدر شيتل نواس میں اس وقت ایک اہم سفارتی مرحلہ طے پایا جب مملکتِ سعودی عرب کے نامزد نیے سفیر استاذ فہد محمد منیخر نے صدرِ نیپال عالیجناپ رام چندر پوڈیل کو اپنی اسنادِ سفارت پیش کیں۔ یہ تقریب بظاہر ایک رسمی سفارتی عمل ہے، مگر اس کے اثرات اور معنویت کہیں زیادہ گہرے اور دور رس ہوتے ہیں۔

اسنادِ سفارت پیش کرنا بین الاقوامی سفارتی روایات کا بنیادی حصہ ہے۔ اس کے ذریعے نہ صرف نئے سفیر کی باضابطہ حیثیت تسلیم کی جاتی ہے بلکہ دو ممالک کے مابین اعتماد، احترام اور تعاون کے نئے عہد کا آغاز بھی ہوتا ہے۔ سعودی عرب اور نیپال کے تعلقات گزشتہ دہائیوں میں نمایاں طور پر مضبوط ہوئے ہیں، خصوصاً افرادی قوت، معاشی تعاون اور ترقیاتی شعبوں میں۔

نیپال کی ایک بڑی افرادی قوت سعودی عرب میں خدمات انجام دے رہی ہے، جو دونوں ممالک کے درمیان معاشی روابط کی ایک اہم کڑی ہے۔ ایسے میں نئے سفیر کی تقرری اور ان کی باضابطہ ذمہ داریوں کا آغاز اس بات کا اشارہ ہے کہ دونوں ممالک تعلقات کو مزید منظم، فعال اور نتیجہ خیز بنانے کے خواہاں ہیں۔

موجودہ عالمی حالات میں ایشیائی ممالک کے درمیان باہمی اشتراک، سرمایہ کاری، اور اقتصادی تنوع کی ضرورت پہلے سے زیادہ بڑھ چکی ہے۔ سعودی عرب اپنی وژن 2030 اصلاحات کے تحت عالمی شراکت داری کو فروغ دے رہا ہے، جبکہ نیپال ترقی، سرمایہ کاری اور بیرونی تعاون کے نئے مواقع تلاش کر رہا ہے۔ اس تناظر میں یہ سفارتی پیش رفت دونوں ممالک کے لیے نئے امکانات کی راہ ہموار کر سکتی ہے۔

توقع کی جا رہی ہے کہ آئندہ دنوں میں دو طرفہ وفود کے تبادلے، تجارتی معاہدوں، اور افرادی قوت کے معاملات میں مزید بہتری دیکھنے کو ملے گی۔ اسنادِ سفارت کی یہ تقریب دراصل ایک نئے باب کا آغاز ہے، جو باہمی احترام، تعاون اور مشترکہ مفادات کی بنیاد پر آگے بڑھے گا

اس تقریب میں مجموعی طور پر پانچ نئے سفیروں نے صدر کو اسناد پیش کیں، جن میں سعودی عرب کے علاوہ آسٹریلیا اور چین کے سفیر بھی شامل تھے۔