دبئى- آخر کار ون ڈے ورلڈ کپ کا شیڈول جاری کر دیا گیا۔ آئی سی سی نے ممبئی میں منعقدہ ایک تقریب میں اس ٹورنامنٹ کے شیڈول کا اعلان کیا جو مکمل طور پر ہندوستان میں پہلی بار منعقد ہونے جا رہا ہے۔ ورلڈ کپ 5 اکتوبر سے احمد آباد میں شروع ہوگا۔ اس دن، 2019 ورلڈ کپ کی فائنلسٹ انگلینڈ-نیوزی لینڈ کی ٹیمیں ٹورنامنٹ کے افتتاحی میچ میں نریندر مودی کرکٹ اسٹیڈیم میں ٹکرائیں گی۔ فائنل بھی یہاں 19 نومبر کو کھیلا جائے گا۔ ٹورنامنٹ 46 دن تک جاری رہے گا اور 10 مختلف شہروں میں سیمی فائنل اور فائنل سمیت کل 48 میچز کھیلے جائیں گے۔
ورلڈ کپ میں 6 میچ ہوں گے جو ہندوستانی وقت کے مطابق صبح 10.30 بجے شروع ہوں گے۔ باقی تمام میچ ڈے نائٹ ہوں گے اور یہ دوپہر 2 بجے سے شروع ہوں گے۔ آئیے آپ کو ورلڈ کپ کے شیڈول سے متعلق 5 بڑی باتیں بتاتے ہیں۔
پاکستان کو جھٹکا: ون ڈے ورلڈ کپ کا شیڈول جاری ہونے سے قبل پی سی بی نے آئی سی سی سے اپنے دو میچوں کا مقام تبدیل کرنے کا مطالبہ کیا تھا۔ لیکن، شیڈول سامنے آنے کے بعد یہ واضح ہو گیا ہے کہ آئی سی سی نے پاکستان کا مطالبہ خارج کر دیا۔ پاکستان اپنے 2 میچوں کا مقام تبدیل کرنا چاہتا تھا۔ وہ افغانستان سے چنئی میں اور بنگلور میں آسٹریلیا سے بھڑنا نہیں چاہتا تھا۔ پاکستان چاہتا تھا کہ چنئی میں اسے جو مقابلہ افغانستان کے خلاف کھیلنا ہے، اسے بنگلورو شفٹ کر دیا جائے اور آسٹریلیا کے خلاف جو میچ بنگلورو میںہونا ہے وہ چنئی میں کھیلا جائے۔لیکن آئی سی سی نے پاکستان کی ایک نہیں سنی اور پاکستان کے یہ دونوں میچز مقررہ مقام پر ہی کھیلے جائیں گے۔
راؤنڈ رابن فارمیٹ میں کھیلا جائے گا ٹورنامنٹ : آئی سی سی ورلڈ کپ 2023 بھی گزشتہ ٹورنامنٹ کی طرح راؤنڈ رابن فارمیٹ کی بنیاد پر ہی کھیلا جائے گا۔ پچھلے ورلڈ کپ کی طرح، تمام 10 ٹیمیں لیگ مرحلے میں ایک بار آمنے سامنے ہوں گی اور ٹاپ 4 ٹیمیں سیمی فائنل کے لیے کوالیفائی کریں گی۔
ہندوستان سب سے زیادہ سفر کرے گا: ٹیم انڈیا لیگ مرحلے میں 10 میں سے 9 مقامات پر اپنے میچ کھیلے گی۔ پاکستان اپنے تمام میچ 5 شہروں میں کھیلے گا۔ یعنی ہندوستان باقی ٹیموں کے مقابلے میں سب سے زیادہ سفر کرے گا۔
ممبئی-کولکاتہ میں سیمی فائنل: ون ڈے ورلڈ کپ کا پہلا سیمی فائنل 15 نومبر کو ممبئی اور دوسرا 16 نومبر کو کولکاتہ میں ہوگا۔ فائنل 19 نومبر کو احمد آباد کے نریندر مودی اسٹیڈیم میں کھیلا جائے گا۔
ناک آؤٹ میچ کے لیے ریزرو ڈے: ورلڈ کپ کے سیمی فائنل اور فائنل دونوں کے لیے ریزرو ڈے رکھا گیا ہے۔ اگر بارش یا کسی اور وجہ سے یہ میچ طے شیڈول اور دن کے مطابق نہ ہوسکے تو اگلے روز کھیلے جائیں گے۔ تمام ناک آؤٹ میچز ڈے نائٹ ہوں گے جو ہندوستانی وقت کے مطابق دوپہر 2 بجے شروع ہوں گے۔
آپ کی راۓ