نیپال: حکمراں اتحاد سے ناطہ توڑنے پر جنتا سماجوادی کے چار وزراء برخواست

کٹھمنڈو / کئیر خبر
وزیر اعظم شیر بہادر دیوبا نے جنتا سماج وادی پارٹی (جے ایس پی) کی نمائندگی کرنے والے چار وزراء کو فارغ کر دیا ہے جنہوں نے گزشتہ ہفتے حکمران اتحاد چھوڑ دیا تھا۔

صدر بدیا دیوی بھنڈاری نے نیپال کے آئین کے آرٹیکل 77 (2) کے مطابق وزیر اعظم شیر بہادر دیوبا کی سفارش پر وزرا کو ان کے متعلقہ وزارتی قلمدانوں سے فارغ کر دیا۔ وزارتی عہدے سے فارغ کیے جانے والوں میں وفاقی امور اور عام انتظامیہ کے وزیر راجندر شریستھا، وزیر جنگلات اور ماحولیات پردیپ یادو، فزیکل انفراسٹرکچر کے وزیر محمد اشتیاق رائی اور وزیر زراعت مرجیندر کمار سنگھ شامل ہیں۔

الیکشن کمیشن کے ضابطہ اخلاق کے مطابق اگر ان وزراء کو ہٹا بھی دیا جائے تو وزیراعظم کے نئے وزراء کی تعیناتی کے امکانات بہت کم ہیں۔ الیکشن کمیشن کا کہنا ہے کہ کابینہ میں نئی ​​تقرریوں سے انتخابی ضابطہ اخلاق کی خلاف ورزی ہوگی۔

صدر جمہوریہ دفتر کی طرف سے جاری کردہ ایک پریس بیان کے مطابق، قانون، انصاف اور پارلیمانی امور کے وزیر گوبند پرساد شرما (کوئرالا) کو بھی عہدے سے فارغ کر دیا گیا ہے کیونکہ وہ چھ ماہ کے اندر وفاقی پارلیمنٹ کے رکن نہیں بن سکے جیسا کہ نیپال کے آئین کا آرٹیکل 78 میں اسکی وضاحت ہے ۔ مواصلات اور انفارمیشن ٹیکنالوجی کے وزیر گیانیندر بہادر کارکی کو وزارت قانون کی ذمہ داری بھی سونپی گئی ہے۔