تنوشری دتہ کا ایک اور حیرت انگیز انکشاف

بالی وڈ کے ورسٹائل اداکار نانا پاٹیکر پر جنسی ہراسانی کا الزام لگانے والی بھارتی اداکارہ تنوشری دتہ نے ایک اور حیرت انگیز انکشاف کر ڈالا۔

بھارتی میڈیا کے مطابق سابقہ’ مس انڈیا‘ تنوشری دتہ نے انکشاف کیا ہے کہ 2005 میں بننے والی ان کی پہلی فلم ’چاکلیٹ‘ میں انہیں ڈائریکٹر کی جانب سے بد تمیزی کا سامنا کرنا پڑا۔

تنوشری دتہ کا کہنا ہے کہ فلم کی شوٹنگ کے دوران انہیں نا زیبا انداز میں ڈانس کرنے کو کہا گیا جو وہیں موجود بھارتی اداکار عرفان خان اور سنیل شیٹی کو بھی ناگوار گزرا اور انہوں نے ڈائریکٹر کے اس عمل پرسخت ردّ عمل کا بھی اظہار کیا۔

انہوں نے عرفان خان کی تعریف کرتے ہوئے کہا کہ بالی وڈ انڈسٹری میں اچھے لوگ بھی ہیں ۔ اس وقت عرفان خان اور سنیل شیٹی ہی تھے جنہوں نے مجھے بچایا اور میرے حق میں بولے۔سنیل شیٹی نے میرا دفاع کرتے ہوئے کہا کہ ’ اس کام کے لئے میں آؤں کیا‘۔