جھنڈانگر نیپال سے مولانا زاہد آزاد جھنڈانگری کے اطلاع کے مطابق جامعہ سلفیہ بنارس کے سابق استاذ شعبۂ حفظ جناب حافظ عبدالحکیم فیضی رحمہ اللہ کا ہزاروں سوگواروں کی موجودگی میں صبح ۹؍ بجے تدفین عمل میں آئی۔
انسان کے اعمال صالحہ میں شخصیت و کردار حسن و اخلاق ہی شخصیت کو سنوارتے اور بناتے ہیں، کچھ لوگ حسن اخلاق کے اعلیٰ معیار پر فائز ہوتے ہیں اور ان کی زندگی کا مقصد تعلیم و تعلم سے ہوتا ہے، انہیں صفات و کردار کے مالک تھے حافظ فیضی رحمہ اللہ، جنہیں رحمہ اللہ لکھتے ہوئے کلیجہ منہ کو آتا ہے، ان خیالات کا اظہار مشرف جامعہ خدیجۃ الکبری نے کیا۔
مولانا عبدالعظیم مدنی ناظم جامعہ خدیجۃ الکبریٰ نے کہا کہ انسان دنیا سے رخصت ہوجاتا ہے مگر اپنے اخلاق و کردار کی وجہ سے لوگوں کے دلوں میں زندہ رہتا ہے، آپ حسن اخلاق کا اعلیٰ نمونہ تھے، مولانا عبدالمنان سلفی خطیب جامع مسجد جھنڈانگر نے کہااللہ تعالیٰ حافظ رحمہ اللہ کی مغفرت فرمائے، ان کی لغزشوں کو معاف کرے، ان کی طویل قرآنی خدمات کو قبول فرمائے، واضح رہے کہ لگ بھگ پچاس سالوں تک آپ قرآن پڑھتے اور پڑھاتے رہے، اللہ ان کے پسماندگان کو صبر جمیل کی توفیق بخشے، مولانا مطیع اللہ مدنی شیخ الحدیث جامعہ خدیجۃ الکبریٰ نے کہا: استاذ محترم حافظ عبدالحکیم فیضی نے ہمیں جامعہ سلفیہ میں قرآن کی تعلیم دی، آپ ایک نہایت ہی رحم دل اور سنجیدہ فکر انسان تھے، آپ کے احباب و نیاز مندوں کا وسیع حلقہ تھا، شاگردوں کی تعداد بہت بڑی ہے، آپ نیک انسان تھے، صلاۃ کی پابندی ایسی کی کمزوری کے باوجود برابر مسجد آتے رہے، آپ کی خوبیاں تھیں زیادہ اللہ ان کی نیکیاں قبول فرمائے، مہتمم جامعہ نے کہا کہ آپ مہمان نواز، علم دوست، دوستوں کے دوست ہی نہیں دشمنوں کے بھی دوست تھے۔ مولانا عبدالقیوم مدنی، مولانا محمد اکرم عالیاوی وغیرہ نے گہرے رنج و غم کا اظہار کیا۔
آپ جامعہ رحمانیہ بنارس میں ۱۹۷۷ء ؁ میں طلبہ جامعہ کو تجوید سکھانے پر مامور ہوئے، آپ ۱۹۴۴ء ؁ شنکر نگر، ضلع بلرام پور نامی معروف علمی بستی میں پیدا ہوئے، حافظ صاحب رحمہ اللہ جھنڈانگر نیپال کے سب سے بڑے خاندان خانوادۂ میاں محمد زکریا رحمہ اللہ کے سب سے بڑے داماد تھے، آپ نہایت ہی نضیف و صاف ستھری شخصیت کے مالک تھے، آپ کا کپڑا ہمیشہ بے داغ ہوا کرتا تھا، آپ نے ایک باوقار اور بھر پور زندگی گزاری، پسماندگان میں ۶ بیٹے حافظ عبدالولی ،مولانا عبدالعلی، حافظ عبدالقوی، عبدالحئی، عبدالعلیم، عبدالآخر اور چار بیٹیاں پوتے پوتیاں اور نواسیاں و احفاد کی ایک بڑی تعداد ہے، اس وقت خانوادہ میاں محمد زکریا ایک بڑے غم میں مبتلاء ہے اللہ ان کے حسنات کو قبول فرمائے اور پسماندگان کو صبر جمیل عطا فرمائے۔ آمین
واضح رہے کہ آپ کی پوری عمر تعلیم و تحفیظ قرآن کریم میں گزری ہے، بنارس میں وہ ۱۹۷۸ء ؁ سے ۲۰۱۷ء ؁ تک شعبۂ تحفیظ میں پڑھاتے رہے۔یہ ان کے اعلیٰ اخلاق اور دین اسلام سے محبت کا منہ بولتا ثبوت تھا کہ نماز جنازہ میں علماء، طلباء، قراء کرام اور جامعہ سلفیہ بنارس سے مولانا اسعد اعظمی مدنی ، مولانا ظل الرحمن فائق سلفی، مولانا معین الدین مدنی، جامعہ سلفیہ کے شعبۂ حفظ کے تمام اساتذہ حافظ صاحب کے جگری دوست ماسٹر احمد حسین و مولانا محمد عیسیٰ سلفی، مؤ سے خطیب اعلیٰ مولانا عبدالشکور صاحب اثری، جامعہ سراج العلوم جھنڈانگر و کلیہ عائشہ صدیقہ کے اساتذہ و طلبہ کے علاوہ عوام الناس کی ایک بڑی تعداد صبح ۹؍ بجے جھنڈانگر کے قبرستان میں موجود تھی۔
آپ کی نماز جنازہ آپ کے بڑے صاحبزادے مولانا عبدالعلی فیضی نے پڑھائی۔
اللہ آپ کے تسامحات کو معاف فرمائے اور جنت الفردوس میں اعلیٰ مقام عطا کرے۔ آمین