ترے محل سے سٹی جھونپڑی نہیں میری؟
تری جڑوں سے اٹھی گرد بھی نہیں میری!

یوں بھوک سے مِرے بچے اگر تڑپتے رہے
جو تیرے حلق پہ آری چلی، نہیں میری

جدا ہیں مجھ سے مِرے گندم و شعیر اگر
عرق سے سینچی ہوئی فصل بھی نہیں میری

پڑا ہوں راہگزر پر کہ در نہیں کوئی
کچل دے مجھ کو کہ یہ جان بھی نہیں میری

مرا پسینہ ہے شامل لہو کی سانسوں میں
حیات و موت کی یہ ڈور بھی نہیں میری

زمانہ جس کو سمجھتا ہے شمسؔ کا جلوہ
خدا کا نور ہے وہ روشنی نہیں میری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شمس الرب شمسؔ